17/10/2009     星期六    

二零零七年七月某夜, 男場主執到三隻估計只有三個月大的唐狗bb, 其中兩隻啡色, 另一隻係白底帶少少啡, 樣貌極似一隻小狸貓, 好可愛.

場主為方便辨認取名為  :  中中, 發發(Joey), 白白(覺寶).

中中與發發係同胎姊妹, 中中入場無耐已被有心人睇中, 係第一隻被領養的幸運兒.

發發即小女Joey, 七個月大時無意中見到佢d靚女相而被吸引.  在無把握情況之下同joe law商量, 估唔到佢又同意養多隻狗狗, 但佢鍾情於覺寶, 各執一詞好難作出決定, 最終當然係我贏左啦!!!!! 

時間過得好快, 眨下眼覺寶已二歲多亦無人問津, 唔通一隻咁活潑可愛, 外型咁特別既狗狗要係狗場終老, 係每位義工都唔想見到既事, 但成犬被領養既機會比較渺茫, 大家都為覺寶著急同擔心, 但時機未到又可以點呢. 

十月中一個早上收到一個令人振奮既消息, DDT好友PJ Family決定領養覺寶, 知道果一刻真係好~好~好開心, 好感動.

等左咁耐有緣人終於出現, 大家都萬分雀躍. 

好多謝PJ Family令我解開心結, 自從作出二選一呢個決定, 個心對覺寶總有一份歉疚, 而家安樂晒, 以後仲可以一齊出黎玩.

中, 發, 白係住埋同一個籠, 感情特別深厚

離開前沖埋涼先

入場見証動人既一刻 (photo from PJ family)

跳皮鬼馬既Junet & Ronald帶覺寶離開 (photo from PJ family)

覺寶取名為"Jajumbo", 一聽個名就知幾開心啦, 每次叫都要扭動身體配合的, ha ha, 咁都比你地諗到, 佩服!  佩服!

~~~ 充心祝福狗場既狗狗好似佢地三隻一樣, 有一個痛錫既主人同一個永久既家 ~~~